近日城中最多人玩嘅 AI 玩意，相信就係呢個將人像照片，變成 figure 人偶嘅生成式 AI 新模型 Nano Banana。只要輸入適當描述，十幾秒就可以生成逼真嘅照片，用來同朋友分享都幾好玩。筆者就教大家點樣生成呢種 Figure 人偶相啦！
其實大部分具有文生圖能力嘅多模態生成式 AI 模型都有能力生成呢種 Figure 相，不過最近 Google 就出咗一個代號 Nano Banana 嘅 Gemini 2.5 Flash Image 圖像生成模型嘅預覽版，生成出嚟嘅效果比其他模型都要好。呢個模型一出，引來好多人試玩唔同嘅嘢。喺香港我哋用唔到 Google AI Studio，不過只要透過 LMArena 網站，我哋都能夠將相中人變成 Figure。
LMArena 網址：https://lmarena.ai/
生成教學
生成嘅方法好簡單，只要搵一張人像相或者卡通人物插圖，唔一定需要全身，但最好見到腰，角度誇張啲都得，不過咁當然容貌會有較大失真。另外要注意身裁太好、太多肉地嘅相係會拒絕生成嘅。
1. 喺輸入框按左下角嘅 Generate Images；
2. 上傳圖片，並輸入提示句要求生成「realistic photo of a collectible figure」，動作同手持物件可以寫喺提示句裡面，不過玩具商標誌同屏幕上軟件嘅變化就唔係咁多，例如只有 Bandai 標誌同開源 3D 軟件 Blender 係最準確嘅。大家可以修改以下提示句例子試下唔同效果：
Using the nano-banana model, turn this image into a realistic photo of a collectible figure holding a banana, in realistic style and environment.
Place the figure on a computer desk. Next to the computer screen; place a packing box with rounded corner design and a transparent front window, so that the figure inside is clearly visible. The box should also be printed with the figure's original artwork and "PCM 電腦廣場" logo.
On the computer screen, display the Blender modeling process of the figure.
3. 按右下角的掣開始生成，一般十幾廿秒就完成。LMArena 會生成兩張圖片，各用唔同嘅模型嚟生成，系統先唔會話你知用乜嘢模型生成，要你評價兩張圖片邊張好啲。你選擇後佢就會揭曉答案。
一般嚟講用 Nano Banana 生成嘅圖片會靚啲，但唔一定完全準確。由於有機會兩張都唔係用 Nano Banana 嚟生成，所以一定要喺提示句指名用「nano-banana model」。
至於圖中嘅字，雖然係接受中文，不過正確程度只係一半一半，例如「電腦廣場」4 個字，就只有「電」同「場」兩個字寫啱，大家想喺張相印上中文字例如相中人人名要注意。
