近年科技界 AI 技術進步神速，為用家帶來無數便利，但便利背後絕對係高速燒銀紙。全球首富馬斯克（Elon Musk）旗下 xAI，推出 Grok 後雖然廣受好評，但優秀表現的代價卻是極高昂成本，每個月豪花 10 億美金，即係超過 78 億港紙，究竟夠買幾多杯珍奶？
xAI 燒錢大計主要用於打造旗下頂尖 AI 模型，但購買 AI 晶片、堆砌及運行伺服器實在超級燒錢。xAI 目前已於美國田納西州曼非斯（Memphis）部署 Colossus 超級電腦，最初組建時為 10 萬顆 NVIDIA H100 GPU，現已增加及更新至 20 萬顆 NVIDIA H200 GPU。xAI 更計劃於第二個地點興建新超級電腦，由 100 萬顆 NVIDIA Blackwell GPU 組成，成為全世界首個 Gigawatt 級訓練叢集，如此大規模部署顯然要花費上百億美金。不過 xAI 預估今年收入只有 5 億美金，相比 OpenAI 預估有 127 億美金收入，確實係天淵之別。
外媒引述了解 xAI 財務狀況人士稱，從 2023 年成立到 2025 年 6 月，xAI 已籌集 140 億美元的資金。但截至今年第一季初，xAI 僅剩下 40 億美元，該公司預計將於今年第二季耗費幾乎所有剩餘資金。為應付 xAI 超高燒錢速度，身為全球首富的馬斯克都要經常伸手問投資者「攞錢」，目標係完成 93 億美金債務同股權融資，當中有 43 億係新股權資金，另有 50 億係摩根士丹利方面嘅債務，專為興建數據中心而設。但即使此筆資金都未到手，該公司已經打算於 3 個月內花費一半以上，幾乎當燒銀紙如燒柴。更離譜的是，2026 年 xAI 計劃再籌 64 億美金，籌錢快過射火箭，有如掟錢落 AI 黑洞。
馬斯克向來以狂人見稱，當年 Tesla 生產 Model 3 時都試過一季燒 10 億美金，但 xAI 今年預計只有 5 億美金收入，2026 年預估勉強升到 20 億美金，預期要到 2027 年先有望盈利。不過有危亦有機，靠馬斯克個人魅力、加上 X 平台擁有大量數據優勢，仲有自家部署強大超級電腦，毋須再外出租賃伺服器節省開支，如果 xAI 今次豪賭成功，或者最終會成為 AI 大贏家，實現馬斯克的 AI 夢。無論如何，對於用家來說，多一個 AI 平台固然係好事，尤其是 xAI Grok 係少有地支援香港無限制連線使用的先進 AI 平台，大家當然希望繼續有得用啦！
透過甲骨文 OCI 向客戶提供 Grok
另一方面，xAI 日前宣布與甲骨文 (Oracle) 合作，透過甲骨文雲端基礎設施 (OCI) 的生成式 AI 服務向客戶提供 Grok 模型，應用範圍涵蓋內容創作、研究和業務流程自動化等。甲骨文方面就會為 xAI 模型提供企業級的資料治理、管理和安全功能，而所有由 OCI 發送到 Grok 模型的資料都在零資料保留的端點上處理，為企業增加額外保護。
此外，xAI 又將會利用 OCI 的 AI 基礎設施來訓練和運行其下一代 Grok 模型的推理。xAI 稱是看重 OCI 的可擴展性、性能和成本效益。
